Upphaf reksturs Landslaga – lögfræðistofu má rekja til ársins 1971 er Garðar Garðarsson setti á stofn lögfræðistofu í Keflavík. Hann rak stofuna einn til ársins 1980 en þá gekk Vilhjálmur H. Vilhjálmsson inn í reksturinn. Nafni stofunnar var breytt í Landslög – lögfræðistofa þann 30. apríl 1999, en að rekstri stofunnar stóðu þá, auk þeirra Garðars og Vilhjálms, þeir Jóhannes Karl Sveinsson og Jón Sveinsson.

Lögmannsstofan LM Lögmenn á rætur sínar að rekja til 19. ágúst 1977, er Baldur Guðlaugsson, Jón Steinar Gunnlaugsson, Sverrir Ingólfsson og Þorsteinn Haraldsson stofnuðu lögmanns- og endurskoðunarstofu í húsnæði Nýja Bíós við Lækjargötu en fluttu síðar upp á Skólavörðustíg 12. Árið 1990 gekk Kristján Þorbergsson til liðs við Baldur Guðlaugsson og var nafnið Lögmenn Skólavörðustíg 12 þá tekið upp á stofu þeirra. Árið 2007 var nafni hennar breytt í LM Lögmenn, en þá stóðu að rekstrinum, auk Kristjáns, Jóhannes Bjarni Björnsson, Hlynur Halldórsson og Hörður Helgi Helgason.

Þann 1. júlí 2010 voru Landslög – lögfræðistofa og LM Lögmenn sameinuð. Hin sameinaða stofa heitir Landslög. Eigendur Landslaga eru 12 talsins en alls starfa 20 lögfræðingar á stofunni. Þar af eru 17 með lögmannsréttindi en átta þeirra hafa réttindi til málflutnings fyrir Hæstarétti. Heildarfjöldi starfsmanna stofunnar er tæplega 30.

Lögmenn Landslaga búa yfir áratugalangri reynslu af flestum sviðum lögfræðinnar. Landslög geta því boðið sérhæfða þjónustu á helstu starfssviðum stofunnar, svo sem við samninga- og skjalagerð, álitsgerðir, hlutafélagarétt, leigusamninga, einkalífsrétt, samkeppnisrétt, sjó- og flutningarétt, skipasölu, stjórnsýslurétt, sveitarstjórnarrétt, upplýsingatæknirétt, vátryggingarétt, verksamninga og innheimtur svo eitthvað sé nefnt. Þá veitir stofan alla almenna ráðgjöf, hefur með höndum skipti dánar- og þrotabúa, málflutning, uppgjör slysa- og skaðabótamála o.fl.