Landslög - Skaðabætur

Hafðu samband ef þú hefur lent í slysi

Ef þú telur að þú eigir rétt á slysabótum eða hefur spurningar um bótarétt hafðu þá samband í síma 520 2900 eða sendu póst á netfangið landslog@landslog.is þér að kostnaðarlausu.

Nýttu þér lögfræðiráðgjöf lögmanna Landslaga og athugaðu hvort þú eigir mögulegan bótarétt vegna slyss. Landslög býður upp á alhliða ráðgjöf um slysabætur án nokkurrar skuldbindingar.

Þú átt mögulega rétt á slysabótum vegna:

Umferðarslyss í rétti eða órétti, þ.m.t. bifhjólaslysa, vélsleðaslysa og fjórhjólaslysa eða slysa vegna annarra vélknúinna ökutækja

Vinnuslyss

Slyss við læknismeðferð (læknamistaka)

Líkamsárásar

Annarra slysa

Ef þú hefur lent í slysi áttu mögulega rétt á skaðabótum fyrir:

Útlagðan kostnað vegna læknismeðferðar og annarrar meðferðar, t.d. sjúkraþjálfara.

Ferðakostnað

Munatjón

Þjáningar

Vinnutap í kjölfar slyssins

Miska og læknisfræðilega örorku

Varanlega örorku og missi á framtíðarstarfsgetu

Reynsla og sérfræðiþekking í innheimtu slysabóta

Lögmenn Landslaga veita alla þjónustu vegna innheimtu slysabóta, sjá um alla gagnaöflun og rekstur mála, allt frá frumstigi til uppgjörs slysabóta. Hæstaréttarlögmennirnir Vilhjálmur H. Vilhjálmsson, Viðar Lúðvíksson og Grímur Sigurðsson stýra sérhæfðri deild Landslaga sem sinnir slysa– og skaðabótamálum.

Vilhjálmur H. Vilhjálmsson, hrl. hefur yfir 30 ára farsæla reynslu við innheimtu slysabóta. Hann hefur rekið fjölda slysabótamála fyrir dómstólum, þar af mörg grundvallarmál í skaðabótarétti. Að auki sinna héraðsdómslögmennirnir Daníel Isebarn Ágústsson, Hildur Ýr Viðarsdóttir, Ingunn Agnes Kro og Tómas Hrafn Sveinsson slysamálum hjá Landslögum.

Lögmenn hjá Landslögum hafa áratuga reynslu af rekstri og uppgjörum slysa- og skaðabótamála og hafa rekið fjölda dómsmála þar sem reynt hefur á grundvallaratriði á sviði skaðabótaréttar. Reynsla lögmannanna og sérhæfing þeirra við innheimtu slysabóta er trygging fyrir þekkingu og vönduðum vinnubrögðum. Meðal nýlegra dóma í slysabótamálum má nefna:

Þann 5. febrúar 2009 var staðfest með dómi Héraðsdóms Reykjavíkur að vátryggingafélagi bæri að greiða allan sjúkrakostnað umbjóðanda Landslaga-lögfræðistofu í kjölfar umferðarslyss, auk dráttarvaxta og málskostnaðar. Vátryggingafélagið sem var greiðsluskylt vegna umferðarslyssins neitaði að greiða sjúkraþjálfunar- og lyfjakostnað sem féll til meira en þremur mánuðum eftir slysið, þ.e. eftir svokallaðan stöðugleikatímapunkt (batahvörf). Héraðsdómur taldi sannað með læknisfræðilegum gögnum að hin slasaða hefði haft verki vegna meiðsla sem hún hlaut í umferðarslysinu og að henni hafi verið nauðsynlegt að leita bóta á því með sjúkraþjálfun og lyfjum þrátt fyrir að matsmenn teldu síðar að heilsufar hennar hefði verið stöðugt fyrir þann tíma. Tómas Hrafn Sveinsson, hdl., flutti málið fyrir hönd hinnar slösuðu, sjá dóminn hér. Fyrir þá sem lenda í slysum skiptir miklu máli að geta dregið úr afleiðingum þeirra með sjúkraþjálfun og eðlilegri læknisfræðilegri endurhæfingu án þess að verða fyrir verulegu fjárhagstjóni vegna þess. Dómurinn er skýrt fordæmi þess efnis að vátryggingafélögum og öðrum greiðsluskyldum aðilum ber að greiða allan sjúkrakostnað vegna slyss.

Þann 15. janúar 2009 staðfesti Hæstiréttur Íslands niðurstöðu héraðsdóms þess efnis að fyrrum ráðgefandi læknir tryggingarfélags væri vanhæfur til matsstarfa í skaðabótamáli vegna umferðarslyss sem umbjóðandi Landslaga-lögfræðistofu höfðaði gegn tryggingafélaginu. Málið laut að því að umræddur læknir hafði verið dómkvaddur sem matsmaður til að meta tilteknar afleiðingar slyssins. Hæstiréttur felldi þá dómkvaðningu úr gildi vegna vanhæfis matsmannsins. Lögmenn Landslaga leggja ríka áherslu á að umbjóðendur stofunnar verði aðeins metnir af óhlutdrægum matsmönnum. Viðar Lúðvíksson, hrl., flutti málið fyrir hönd hins slasaða, sjá dóminn hér.

Þann 23. október 2008 var staðfest með dómi Hæstaréttar Íslands skaðabótakrafa umbjóðanda Landslaga-lögfræðistofu á hendur tryggingafélagi, en tryggingafélagið hafði haldið því fram að bótakrafan væri fyrnd. Hæstiréttur taldi að miða bæri upphaf fyrningarfrests skv. 99. gr. umferðarlaga nr. 50/1987 við það tímamark er hinni slösuðu hefði fyrst verið ljóst að hún hefði hlotið varanleg mein af slysinu, en það var eftir að hún leitaði til sérfræðings í bæklunarlækningum. Þessi dómur er nýtt og skýrt fordæmi á sviði skaðabótaréttar um upphafstíma fyrningarfrests skaðabótakrafna vegna umferðarslysa. Grímur Sigurðsson, hrl., flutti málið fyrir tjónþola, sjá dóminn hér.

Þann 25. apríl 2008 voru umbjóðanda Landslaga-lögfræðistofu dæmdar 43 milljónir króna auk vaxta og dráttarvaxta í skaðabætur vegna slyss. Þetta er ein hæsta skaðabótakrafan sem dæmd hefur verið í íslenskum rétti vegna líkamstjóns. Grímur Sigurðsson, hrl., flutti málið fyrir tjónþola, sjá dóminn hér.

Milliliðalaus aðgangur að þínum lögmanni

Lögmenn hjá Landslögum vinna í nánu samstarfi við hinn slasaða, sem hefur frá upphafi milliliðalausan aðgang að sínum lögmanni.

Að lenda í slysi

Það verðmætasta sem við eigum er heilsa okkar. Það getur því verið mikið áfall að lenda í slysi. Hinn slasaði og aðstandendur hans hafa vitaskuld mestar áhyggjur af því hvort og hvenær hinn slasaði nær aftur fullri heilsu. Góð heilsa er hins vegar ekki eingöngu stór þáttur í því hvernig við fáum notið lífsins, heldur er heilsa okkar einnig grundvöllur þess að við getum aflað tekna. Af þeim sökum er það tvöfalt áfall að slasast, því til viðbótar áhyggjum af líkamlegum afleiðingum slyssins koma áhyggjur af fjármálum. Í kjölfar slyss missa menn í mörgum tilvikum umtalsverðar tekjur og geta lent í fjárhagslegum örðugleikum ef ekkert er að gert. Við þær aðstæður er algengt að spurningar sem þessar vakni:

Á ég rétt á að fá greidd laun frá vinnuveitanda mínum á meðan ég er óvinnufær og þá hversu há og hve lengi?

Á ég rétt til greiðslu úr lífeyrissjóði?

Á ég rétt til greiðslu úr slysatryggingum?

Á ég rétt til greiðslu frá Tryggingastofnun ríkisins?

Á ég skaðabótarétt á hendur einhverjum vegna slyssins?

Það getur verið erfitt að átta sig á hvert á að snúa sér til að fá svör við spurningum sem þessum. Bótauppgjör eru oft flókin og erfitt fyrir fólk að átta sig á hvaða kröfur er eðlilegt að setja fram, auk þess sem öflun nauðsynlegra gagna getur verið umfangsmikil og tímafrek. Það er því engin tilviljun að þeir sem lent hafa í slysum leita jafnan aðstoðar hjá lögmönnum með sérþekkingu á uppgjörum í slysamálum. Það er meira að segja svo að þeir sem greiða hinum slösuðu bætur, þ.e. einkum vátryggingafélög, mæla sérstaklega með því að þeir ráði sér lögmann með sérþekkingu á sviði slysamála til að annast rekstur mála sinna. Með því er tryggt að rekstur málsins gengur eins hratt fyrir sig og kostur er og hinn slasaði fær allar þær bætur sem hann á rétt á.

Hversu lengi tekur rekstur slysamáls?

Rekstur slysamála tekur mislangan tíma. Það ræðst af eðli þeirra áverka sem viðkomandi hlýtur í slysinu. Lögmenn hjá Landslögum gera allt sem í þeirra valdi stendur til þess að mál gangi eins greiðlega fyrir sig og öruggt er.

Kostnaður við rekstur slysamáls

Þegar hinn slasaði á rétt á slysabótum vegna slyss er hinum skaðabótaskylda skylt að greiða hinum slasaða kostnað hans af að ráða sér lögmann. Skjólstæðingur hjá Landslögum fær í því tilviki greiddan stærstan hluta kostnaðar vegna lögmannsþjónustunnar frá þeim sem greiðir honum slysabætur.

Ef engar bætur fást greiddar er engin þóknun greidd Landslögum. Það gildir þó ekki um mál sem nauðsynlegt er að reka fyrir dómstólum.

Að auki fær hinn slasaði yfirleitt útlagðan kostnað sinn vegna læknismeðferðar og annarrar meðferðar, t.d. sjúkraþjálfara, bættan úr hendi þess sem ábyrgð ber á slysinu, t.d. tryggingarfélögum.

Ókeypis ráðgjöf um bótarétt vegna slysa

Ef þú telur að þú eigir rétt á slysabótum eða hefur spurningar um bótarétt hafðu þá samband í síma 520 2900 eða sendu tölvupóst netfangið landslog@landslog.is og fáðu samband við lögmann þér að kostnaðarlausu.